早前美國駐港總領事館拍咗條《歡樂年年》MV賀年短片，同港人拜年，十分幽默，駐港總領事楊甦棣噚日仲粉墨登場着起廚師衫煎羊扒，仲話自己因為屬羊唔食羊，通常都係食魚，保持健康。
楊甦棣噚日出席由美國農業部以及多個美國農產品協會合辦嘅「亞洲廚藝競賽」簡介會時，落手落腳同大廚煮羊扒，親手醃、煎、炒、起碟，煮嘅時候不時露出鬼馬表情兼舞台式謝幕，娛樂性十足。「亞洲廚藝競賽」由16間酒店、餐廳、航空公司參加，下月12日會決一高下，香港站勝出者會再到台北決戰，終極冠軍可免費到美國接受培訓。
楊甦棣噚日好醒目不談政治，全程唔提狼振英，但就話多謝前政務司司長唐英年任內取消紅酒稅，讓好多人喺香港可以品嚐到各國美酒。至於個《歡樂年年》MV，佢話係按公關嘅劇本照做，連佢喺美國嘅千金都喺facebook開心share。