上月因癌症過身嘅前永倫兼香港籃球隊中鋒「阿勁」陳子浩，性格隨和友善，人緣非常好，一班好友決定下月1日喺灣仔修頓室內場舉辦紀念賽，由永倫對阿勁有份效力過嘅業餘球隊野蠻人，潘志豪等現役永倫主力都會落場，比賽亦會播出「阿勁」生前嘅生活片段，佢嘅新知舊雨亦會發言分享往事。有心人可以喺晚上7點免費入場。