中環人最近食晏好苦惱，事關置地廣場入面間高檔超市ThreeSixty下周一關門，美食廣場部份前日率先關門大吉，好多中環人習慣去呢個美食廣場買外賣，雖然買個飯盒七、八十蚊冇走雞，但勝在就腳。
芝士打倒咖啡
之不過，過年前有間新餐廳就喺置地對面嘅新世界大廈開張，就係新世界發展（017）主席鄭家純女婿龐建貽開嘅Classified。呢個舖位原先由一間咖啡連鎖店租開，最近轉租畀賣芝士出晒名嘅Classified。
喺呢間分店打工嘅員工真係要打醒二百分精神，事關老闆娘一家就喺樓上返工，有乜失誤好易傳到入龐老闆耳朵。不過咁都係顧客之福，調番轉講，呢間分店嘅服務同食物水準肯定有保證。