【中環蘭桂坊】擁34E巨胸嘅𡃁模陳靜（DaDa）同陳偉霆前晚7點鐘左右，喺中環蘭桂坊拍攝電影《重口味》外景，同場嘅除咗兩位主角，仲搵咗翻版PSY錢國偉客串一角。錢國偉嘅女友陳宛蔚，仲帶埋選過亞姐嘅「臭口Barbie」廖祉甯探班。
前晚場戲好簡單，錢國偉飾演DaDa嘅男朋友，點知俾DaDa同陳偉霆撞破佢攬女偷食，DaDa即刻跳車上前質問。陳偉霆戲中架車都幾浮誇，全車粉紅色非常搶鏡，不過全晚最精采嘅都係DaDa，自從佢喺《低俗喜劇》飾演爆炸糖之後，有得提名台灣金馬獎同香港電影金像獎唔在講，最難得係佢成個人開咗竅，簡單一場街頭捉姦對罵戲都拍得好有神韻。
露4吋事業線
DaDa仲喺鬧交時不經意露出4吋事業線，其實佢件衫已經好鬆同低，加上佢手舞足蹈咁講嘢，件衫差唔多成件跌落嚟，睇到現場圍觀睇熱鬧嘅自由行不知幾開心，肯定覺得不枉此行。呢個鏡頭前後拍咗五次左右就收工，認真快手。
採訪、攝影：梁繼光、李志明、黃曉程
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/