新地（016）副董事總經理雷霆不愧為樓神，就連春茗都唔放過推銷樓盤嘅機會，新地喺元朗嘅中低密度住宅爾巒攞咗預售樓花紙，780個單位隨時賣得，雷霆噚日專登請記者食意大利菜，襯番個盤嘅意國風情，甜品仲要整個牌仔硬銷，郭老闆想唔加人工都唔得啦！
雖然雷霆一年到晚都掛住賣樓，但係過年都會旅行輕鬆吓，大年初一至三就舉家飛去大阪，日圓滙價最近大跌，睇嚟佢哋食嘢、濕平都可以再豪啲。
玩咗三日，佢年初四、五就飛咗去新加坡視察當地業務。新加坡都有買家印花稅（BSD），雷霆話，新加坡政府推出BSD初期，樓市都吹咗一陣冷風，當地豪宅供應多過香港，情況較香港嚴峻啲咁話。