【走過十年非典人生】薛培餘，很激。2004年，沙士聆訊，他在旁聽席示威；2005年，楊永強受勳，他大呼下台；2006年陳馮富珍獲委任世衞總幹事，他氣得舉牌贈興！他還是唯一與港府對簿公堂的沙士案例。薛培餘說，他的激，都是逼出來的。10年前，還在茶餐廳工作的他，人生只有水吧方寸地，不看新聞、不問世事，最渴望是放工後飲到阿媽親手煲的靚湯。平凡的人生，因為2003年沙士一役，徹底改變！
記者：呂麗嬋
「如果唔係沙士，可能我仲喺水吧沖緊奶茶，喺大陸娶埋老婆都唔定」。人生沒有如果，今日的薛培餘，孑然一身，家住黃大仙上邨，守着仍掛着母親遺照的公屋。
10年了，昔日死城早已重生，但他仍放不下。「沙士，改變我嘅人生，我唔想阿媽死得不明不白。佢過世時，連設個靈堂俾啲親朋戚友鞠個躬、幫佢換件衫都冇機會，你叫我呢個仔點安樂！」
感染沙士死變尿道炎
2003年4月，薛培餘的80歲母親因氣促入住屯門醫院，輾轉住進隔離病房，毗鄰正正就是殉職醫生謝婉雯，其間感染沙士，延至5月中死亡，「人總會死，阿媽年紀大，我有心理準備，我係唔忿氣，由確定死因到申請醫療紀錄，醫管局都扭曲事實」。事隔10年，薛培餘隨口說出日期時間，可見刻骨銘心。
「阿媽5月19日過身，我一個人喺醫院等咗三日，出唔到死亡證，連個主診醫生都行埋嚟同我解釋，話沙士個案要醫院行政總監簽名確認，結果事隔近半年，終於出到死亡證，但話死因係尿道炎！如果真係尿道炎，咁我阿媽6月4日點解要極速火化？唔准着衫、二級包裝消毒？連幫佢換件衫都唔得？」
原本只是不問世事的升斗市民，因為最愛的媽媽，他抓狂了，「我由最初想知點解，到後來真係好憤怒！點解要扭曲事實？我日日打電話畀病人聯絡主任，申請覆查醫療紀錄，醫院遲遲唔肯畀，我就寫信去申訴專員公署投訴，係咪有人想隱瞞沙士死亡數字？係咪死299人好聽啲？300人會連累延遲解除疫區惡名？」
為了追尋真相，他辭工四出求助；10年前53歲的他，原本在內地相親認識的女子已接近談婚論嫁，但無疾而終，「我對上有四個阿哥，佢哋結晒婚，有自己家庭，阿媽成日同我啲阿嫂講，話佢最大心願就係我娶老婆，係有個女仔睇啱咗，但邊有心情吖」。作為家中么仔，他一直與媽媽同住，感情最好。
「阿媽係賢妻良母，日日放工煮定飯、煲定湯我飲，阿爸係越南華僑，以前細個唔喺香港，寄錢番嚟，日常起居，都係阿媽照顧我哋」。2005年，他透過義務律師，在高院向港府興訟，最終敗訴，但他說總算努力過，只望母親在天之靈能夠安息。「咁多年嚟，好多人都叫我不如算啦，連我啲哥哥同阿嫂都認為我太執着」。
陳馮富珍欠真誠道歉
代價不少，但薛培餘不感後悔，「03年前，我不問世事，只顧自己；現在，我知道一個人嘅生存價值，唔係只為生活，我會參加爭取老人權益嘅小組，我知乜嘢叫社會公義，黑係黑，白係白，唔好畀真相石沉大海。陳馮富珍再返香港，我都會去示威，10年喇，佢欠香港人一個真誠道歉」。63歲的薛培餘，仍然老馬有火。