不好意思，又要「劇透」了，新春看過的另一部華語片是「百星酒店」，典型的賀歲片格局，卻難重拾往昔那種熱鬧搞笑的戲味，足證「合拍片」就似中港關係，既不貌合更是神離。套返噚日嗰句，其實齣戲唔係差，不過以前嗰啲開心爆笑好多啫。
故事發展分幾線進行，唔係點搵戲嚟做，其中一線就係講間酒店面臨降星（級）危機，但喺機緣巧合，陰差陽錯，即係任意推砌下，酒店不單止無被摘星，仲竟然升呢成為一間「特級」五星酒店……又講完。
在電影中的酒店，所發生的一切當可天馬行空，因為要有想像空間，甚或讓觀眾有造夢的機會，不過前提就梗係要佢哋受落先得。而現實世界何嘗唔係，一間平平無奇的酒店，竟然無啦啦變咗個「劃時代地產投資項目」（借用樓神語），真係少啲想像力都唔得，然觀乎市場反應，又似得咗。亦難怪幾個月前，長實（001）才宣佈會分拆旗下4間酒店上市，言猶在耳，現在已在分拆中，不過卻是將其中一間，位於葵涌的雍澄軒酒店房間拆售，而短短一個鐘就悉數（65間）售罄，套現2.46億，牛刀小試， 劏酒店竟全功，且在政府的顏面劃上一道口子。
買酒店劏房 要自求多褔
縱然「劃時代」是有點托大，「創先例」倒是毋庸置疑，往後亦怕沒有來者，因為政府早在2000年收緊相關條例，堵塞了酒店項目拆售的空子，不過李生總能走在律法之先，快人一步，首富達到！其實無論喺內地定國外，早有將酒店劏售的情況。內地因嚴厲的樓市調控應運而生的限購令，由此催生了「羊頭狗肉」的「酒店服務式住宅」；國外投資者基於穩定收入需求，所以買入酒店房間業權，並委託酒店集團代為出租，賺取房價回報。一切有規可循，亦有法可依。
至於香港，則是新生事物，賣得與否已不是問題，但有咩手尾跟，邊個夠膽講？政府有何能耐維護民眾權益，有目共睹；而市民除了「自求多福」，又有何所恃？
想長實去年在馬鞍山推出新樓盤「天宇海」，起初咪又係銷情熱熾，及後「5樓變地面」和「路旁是花園」的戲法陸續曝光，社會譁然一輪，最終都係無咗件事。現在奇招一出，坊眾又是目眩神迷，爭先恐後，往後恨錯又怪得了誰？剛剛收到訊息通知，看看手機，地產代理又將之前訊息再發一次，不過最尾補多一句：「首批60幾間已全獲認購，餘下的240間，千載難逢，今晚一Q清。」
盧先亞