有白姐姐呢位情人嘅謝偉俊，情人節實在好甜蜜。佢噚日喺中聯辦九龍工作部嘅新春酒會先笑笑口話：「白姐姐係老婆，算唔算情人呢？」其後自揭當日同白姐姐食飯兼睇咗三齣戲，仲送上鮮花同小禮物𠱁佢歡喜㖭。
咁白姐姐又有乜表示呢？謝偉俊二句不說「烏」前個身、「嘟」長個嘴示範如何俾白姐姐啜爆。嘩，八方即刻明晒，亦想像到謝偉俊當時有幾冧。
話時話，噚日八方到酒會現場登記時，西環九龍工作部職員話冇邀請《蘋果》，幾番爭論下都唔畀八方入場，成壇活動好似國家機密咁。西環契仔謝偉俊都替八方唔抵，覺得酒會呢啲喜慶活動，西環使唔使咁小器呢？應該一視同仁吖嘛。