劉嘉玲之前喺北角新光戲院睇完小百花越劇《西廂記》後就話好想做舞台劇，適逢前晚李居明、蓋鳴暉等喺新光搞咗個慶祝重開一周年活動同埋《英烈孔雀王》慶功宴，而現場提供嘅新聞稿就話嘉玲有興趣喺新光演話劇，李居明承認已透過鍾景輝（King sir）接觸嘉玲，仲講到幾有把握㖭。
搵栢芝做神婆
李居明話：「King sir問我畀唔畀得起錢，初步知有得傾，嘉玲鍾意演話劇，可能唔會收足，不過搵佢做，我野心好大，仲想搵埋今年轉大運嘅人做，嗰個就係張栢芝，個個以為佢係票房毒藥，我知道就唔係，初步想搵佢哋演《羅生門》，希望卡士咁大可以畀得起錢，想搵嘉玲做主角，栢芝客串一角做神婆，話佢俾男人靈魂上身，不過未同栢芝講，大家幫吓手問吓。」李居明話同栢芝同謝霆鋒算過，佢哋蛇年會轉運，但提到佢哋會唔會復合，佢就避忌話呢啲唔講，怕講咗後片酬又貴咗。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/