白表免補地價買居屋計劃公佈攪珠結果，攞到頭籌係咪好彩，現階段好難定奪，事關自計劃去年7月公佈以來，中原城市領先指數累升16%，居屋價仲誇張，以新晉居屋王、筲箕灣愛蝶灣為例，短短8個月勁升35%，升到你唔信，唔少未補價嘅居屋入場門檻去到300萬銀，中籤要等到5月先可以入市，隨時接火棒，但住宅租金又越升越有，上唔上車變成兩難局面。
狼英胡亂出招，無殼蝸牛慘遭玩殘，田北俊直指商界認為狼英冇料到，所以當佢冇到，這個說法，一嘢篤中狼英死穴。
講番股市，如果怕股仔風險大，想買番啲穩陣嘢坐吓，不妨向REITs埋手，主要持有乙級商廈及新界商場物業嘅陽光房地產（435），周一公佈中期業績，全年收入淨額增長9.6%，至2.4億元，出租率達98.1%，令人驚喜嘅係零售物業續租租金增長達35.6%，總計平均亦加29.7%，以中期息8.5仙計，年度化息率4.8厘，進可攻退可守。
唐牛