俗語話「同姓三分親」，話唔定同姓一齊做生意都勁過人！阿里巴巴老闆馬雲、騰訊（700）老闆馬化騰同平安保險（2318）董事長馬明哲，舊年一齊籌備搞網上保險平台「眾安在線」，《上海證券報》近日報道，呢間公司已獲中保監開綠燈。
阿里巴巴持股19.9%
眾安在線最特別嘅地方，係冇門市，淨係可以上網買保險，跟番八、九十後嘅消費模式；產品方面，主要做責任險同保證險。
咁三馬點樣三分天下呢？報道話，阿里巴巴持股19.9%，屬最大單一股東，平保同騰訊各佔5%。不過三馬都唔會做董事長，可能由百仕達（1168）主席歐亞平擔任。歐亞平同時得到三位馬生信任，認真唔簡單。