我求大俠真係要向費格遜寫個服字！喺周一嘅英足盃16強，曼聯派副選上陣，但靠後備入替嘅拿尼入完波再做助攻，幫紅魔主場以2:1擊敗雷丁晉級，將會同車路士或者米杜士堡爭入4強。拿尼呢季俾費Sir棄用，今次真係一吐烏氣威番場！雖然費Sir賽後都大讚拿尼，但究竟係真心留人，定係做戲安撫軍心，真係佢老人家先知。
後備入替成晉級功臣
曼聯今場收起朗尼同尹佩斯，朗尼仲連後備都冇。雖然紅魔控制大局，但多次起腳都過唔到雷丁嘅鐵血防線。轉捩點喺38分鐘，曼聯嘅菲爾鍾斯同雷丁中場麥安拿夫爭波時整傷足踝。費Sir相信拿尼，搵佢入場打右翼，路爾斯華倫西亞就打右閘。入場冇耐，佢喺禁區頂窩利抽射，中柱彈出。
費Sir喺64分鐘撳掣換埋尹佩斯入嚟，5分鐘後，少咗人看管嘅拿尼得益，禁區內勁射破網，終於為曼聯開紀錄。3分鐘後拿尼傳中，查維亞靴南迪斯頭槌頂成2:0。雖然雷丁尾段有麥安拿夫破蛋，但紅魔最後保住勝局贏2:1，晉級8強，會對車路士同米杜士堡嘅勝方。
費Sir賽後對拿尼讚口不絕：「我哋都知佢天才橫溢，能力出眾，我早有預感佢可以為我哋贏波。大家都見到佢嘅狀態非常好，如果佢保持呢股氣勢，我以後排陣就頭痕嘞！」不過，由於拿尼扭計加人工，一直都唔得費Sir嘅歡心；佢今季得5次英超正選，喺舊年夏天仲有傳會被賣走。此外，曼聯買咗水晶宮翼鋒韋費特沙夏返嚟，外界估計拿尼好大機會被放棄。雖然踢咗場好波，但我求大俠覺得拿尼喺曼聯嘅前途都係灰灰地。
菲爾鍾斯傷勢似唔輕
雖然晉級，但費Sir都未笑得出住，因為菲爾鍾斯傷勢睇落幾嚴重，賽後要着保護靴同撐拐杖離場，肯定踢唔到嚟緊禮拜六對昆士柏流浪嘅聯賽。至於踢唔踢到下月5號主場對皇家馬德里嘅歐聯就未知，如果到時出唔到，都唔知搵邊個看管基斯坦奴朗拿度。
