商台女名嘴李慧玲,本來放三個星期假享受人生,點知大吉利是,新年流流入咗醫院。民主黨張文光透露,早排同大班朋友去咗李慧玲屋企玩民主黨炮製嘅「鬥快落台魚蝦蟹」,點知席間有人留意到李小姐「大細腳」,呼籲佢快啲去醫院睇醫生,點知原來有菌入腳。
李慧玲自爆,早排一覺醒來發現自己左小腿有個水泡,由一蚊雞咁大變成雞蛋,醫生話佢感染咗金黃葡萄球菌,點知食咗十日抗生素,水泡雖然退咗,但之後腫到好似豬蹄,害得佢三星期大假嘅最後一星期,要入廠繼續食抗生素養病,八方在此祝佢早日康復,迎戰下周三公佈嘅財政預算案。