第二屆中學文憑試仲有兩個月左右就開始，但最近爆出試題洩露疑雲，發佈者竟係考評局。局方本周一喺網頁上載一段短片，教考生試場嘅DOs同DON'Ts。片中有考生示範「兀凳」、滋擾前後座考生，結果被趕到坐埋一邊，仲被警告會扣分。之所以要拍出嚟，因為真係有考生咁做。
戲肉喺第8分鐘，有眼利考生發現片中出現2013年嘅英文科試卷，清楚睇到題目，唔係咁筍嘛？唔通考評局想多啲考生及格？八方睇番先發現，考題原來係舊年英文科卷一B1部嘅題目；考評局就話試卷好保密㗎，邊有咁大隻蛤乸隨街跳？八方都奉勸考生，唔好妄想可以不勞而獲嘞。