梁班子寸土必爭搶地起樓，辣㷫唔少人，教育界早前就好不滿政府想打粉嶺皇后山地皮主意，仲想攞番浸大想起中醫院嘅九龍塘李惠利前校舍部份用地，教育局喺風頭火勢之時，噚日宣佈撥出兩塊地做自資院校，包括《色，戒》取景用地、做過政治集中營嘅摩星嶺域多利道扣押中心，據聞唔少教育團體都虎視眈眈。
曾囚傅奇、石慧夫婦
教育局噚日宣佈，推出佔地6,700平方米嘅前域多利道扣押中心用地，同埋約5,500平方米嘅前五邑工商總會馮平山夫人李穎璋學校校舍，供非牟利院校開辦自資專上課程。當中梗係以有「白屋」之稱嘅前域多利道扣押中心較矚目，事關呢度係由梁朝偉同湯唯主演嘅《色，戒》嘅取景場地嚟㗎，電影中係主角易先生在港嘅秘密居所。
白屋除咗係電影取景勝地，亦一度係政治犯集中營，67年左派暴動期間用嚟囚禁政治犯，著名影星傅奇、石慧夫婦都曾經囚禁喺呢度。由於被列為三級歷史建築物，政府表明成功申請用白屋嘅院校，都要跟從古物古蹟辦事處發出嘅保護指引同要求，截止申請日期係5月3日。
八方唔知屆時白屋裏面唔會有索到好似湯唯咁嘅miss，同埋唔掂到好似局長吳得掂咁嘅學生？但肯定好多團體已經蠢蠢欲動。明德學院同港大附屬學院噚日搶住出聲，話好歡迎政府推地支持自資專上教育發展，研究後會決定係咪申請入主白屋辦學。
mailto:[email protected]
