雖然香港電視（1137）遲遲未獲電視牌，但相信唔少散戶都鍾意呢隻股。事關每次吹風話發牌在望，話知消息來源有幾堅，隻股都例必炒高。如情況持續，大家都仲可以借王維基搵食。
一隻股好消息盡出，冇想像空間係好難大炒特炒；反而越模糊越神秘就越鍾意，價值仲越高。好似俄羅斯烏拉爾（Ural）山區，日前遭隕石擊中令千幾人受傷，件事點計都算係天災。不過經荷里活長期洗腦後，「宇宙」呢兩個字早已同外星人、UFO掛鈎。天外飛星咁浪漫，自然令唔少天文發燒友、UFO愛好者希望可以得到隕石碎片。
有求自然有供，eBay上有人聲稱執到其中一粒手指頭咁大嘅碎片，盛惠999美金，如果賣得出，真係名副其實點「石」成金。睇報道仲話，當地已掀起一陣「淘石熱」，更有人建議將當地發展成旅遊景點，實行大發災難財。所以話世上即使有更浪漫嘅事，人類都有能力搵位「炒」，𠵱家大家明白點解情人節可以成為大節未？
Fifi
本欄逢周二、四刊出