噚日係大年初九開市吉日，商台喺廣播道總台舉行新春團拜，一眾DJ表演詠春、寫揮春同下廚等搞氣氛，而日前喺屋企搞BBQ俾街坊投訴嘅朱薰變成揶揄目標，森美仲祝小儀今年成功引蛇入洞。
陳志雲唔講案件
瞞足7年先宣佈已婚嘅少爺占獲陳志雲同高層甘菁菁笠高帽同喺臉上貼金，預祝稍後棟篤笑成功，少爺占話唔少人追佢過年嘅利是，佢笑言將7年利是總數8,888蚊捐到慈善機構：「咁多年得親戚知，連拍檔Donald都係日前飛去外地之前短訊通知佢自己已婚嘅消息。」少爺占有計劃生BB，但佢話要尋求計日子或技巧呢啲秘方。
日內再上庭嘅陳志雲唔講案件，只公佈商台大計，佢話今年軟硬25周年會有搞作，而拉闊音樂會搵到楊千嬅、張敬軒、梁詠琪等演出，又會重播經典廣播劇同羅文、梅艷芳等珍貴訪問。另外商台又請咗陳輝虹搞45周年嘅《18樓C座》，喺7月以舞台劇形式演出。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/