咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【牛腩篇】小弟除了鍾意足球，籃球也十分鍾愛，身在香港真係幸福，只要你有精神及金錢，安裝兩大收費電視台，世界主流足籃聯賽都冇走雞，周日睇過英足盃、英超、西甲，周一早場睇埋NBA明星賽，睇到拜恩大戰勒邦占士，身為籃球迷都收貨。NBA每年都選東西岸明星隊，再嚟一次大交手，吸睛吸金能力極強；其實歐洲足協每年都搞一次最佳陣容選舉，以柏天尼咁有膽色，冇主辦國嘅歐國盃都夠膽搞，何解又唔辦吓英超、西甲明星賽，或者分東、西歐洲國家隊明星賽等等！
講開歐洲足協嘅最佳陣容，近年都係巴塞隆拿同皇家馬德里兩大豪門壟斷，特別係美斯，唔揀佢基本上對唔住自己。上周六美斯又輕輕鬆鬆入兩粒，幫巴塞隆拿反勝CF格蘭納達2:1，個人累積巴塞入球去到301球。講美斯入波輕鬆，絕對唔係貶義，雖然佢只係25歲仔，已經深明延長個人生涯之道，如果好似C朗咁，場場都死去，射罰球又出盡力，恐怕唔到30歲就要收山。
所以美斯由中圈線扭到去對手禁區嘅鏡頭，已經唔多見，識得避重就輕，遇上對手惡意粗野侵犯，識得收一收都係正路。但欣賞足球比賽，唔單係睇入波，其實以美斯嘅足球天份，點止正前鋒咁簡單，隨住沙維淡出，美斯亦都多作中場派牌責任，畢竟巴塞，以及美斯所屬嘅阿根廷國家隊，都對中場指揮官呢個位更為關心。部份球迷仍認為美斯不及馬勒當拿，或者當美斯開始墮後任中場指揮官，協助阿根廷再奪世盃，先可令反美斯球迷收口。