皇馬紅牌王又有利是收！星期日西甲聯賽皇馬喺主場2:0小勝華歷簡奴，守將沙治奧拉莫斯喺開賽18分鐘裏面做齊所有嘢：入波、黃牌、再黃牌，就咁拎咗佢喺皇馬生涯第16張紅牌提早收工。拉莫斯被逐離場，又喺賽後暗寸教練摩連奴，但話晒做咗贏波功臣，摩帥都冇佢收。
呢場波亦係摩連奴第100次帶領皇馬出戰西甲聯賽，球隊今仗陣容不整，第一次獲西甲正選上陣機會嘅前鋒小將艾華路莫拉達，喺開賽3分鐘就幫主隊先開紀錄。到第12分鐘，沙治奧拉莫斯後上接應奧斯爾傳中一頂入網，無驚無險領先到2:0。不過佢喺45秒內連領兩面黃牌，先係侵犯對手中場查舒拉斯；然後再無無謂謂犯手球被逐離場。
西甲累積拎12紅
本身已經係皇馬球會歷來喺西甲拎紅牌最多嘅紀錄保持者，今次再領紅之後，已經係佢累積第12面西甲紅牌，距離18紅嘅西甲紀錄又邁進一步。拉莫斯𠵱家先係26歲，要成為西甲紅牌王絕對係指日可待。計埋其他賽事所拎嘅紅牌，拉莫斯喺皇馬總共拎咗16紅，認真犀利。
不過拉莫斯本人，喺賽後就對自己又被逐離場大呼冤枉：「今次我真係好hurt囉，就算係我都唔會1分鐘內就連攞兩面黃牌出場。我本身份人一向唔會做出惡意犯規嘅行為，但似乎球證開始有啲針對我，咁真係唔多妥。話晒西甲聯賽擁有世界最出色嘅球員，其實好應該都有最高水準嘅球證嚟執法。」
賽後暗寸摩帥冇品
對教練摩連奴嚟講，拉莫斯要喺下場對拉科魯尼亞嘅聯賽停賽，唯一安慰係後者肯定可以喺下月初對巴塞嘅大戰復出。皇馬喺歐聯16強首回合賽和曼聯，聽講摩帥就好不滿拉莫斯喺比賽中防守不力，搞到畀曼聯入到一球，拉莫斯喺今場球賽後亦有意無意向摩連奴作出反擊：「每個人都有言論自由，以我本人嘅修養就唔鍾意因為輸波而去指摘任何人，尤其係同隊隊友。𠵱家我哋最緊要團結一心。」不過今季拉莫斯兩場攞紅牌嘅比賽，皇馬都係冇失球下贏波，摩帥又真係吹佢唔脹。