海迪平日和中環精英們食飯，除咗向佢哋收風之外，佢哋亦鍾意化身記者問返海迪轉頭，特別係有關於傳媒行業的睇法。最近一年，海迪幾乎每一餐飯都會聽到呢條問題：「互聯網對你哋銷量影響有幾大？到底你哋個網賺唔賺到錢㗎？」
其實何止傳媒？互聯網對每個人生活的影響，五年前講你都唔會信。尤其喺有咗iPhone和穩定網絡呢啲「神之利器」後，幾多盤生意因此出現翻天覆地的轉變？Newsweek唔再出印刷版，HMV爭啲要破產，仲有其他零售、採購、廣告、證券企業……影響無遠弗屆。海迪一位基金朋友，年薪過百萬元，擁有小資品味，近年到內地工作，隨即染上了網上淘寶癮。無他嘅，因為內地shopping唔方便，搭車行過去又遠，揸車又搵半粒鐘都找不到車位，走入百貨公司又迫又多人。經歷幾次咁不愉快經驗後，她從此盡量少上街購物，網上搞掂就算。反正物流成本太便宜，平均送貨只需五元十塊，就算買錯嘢退貨都唔肉痛。
但商家如何將互聯網的潛力，轉化成穩定利潤？至今仍無幾多個生意人搵到答案。除咗阿里巴巴以提供平台模式外，至今無一個內地搞網購，是能成功賺錢的。企業要面對的轉型陣痛，睇怕在可見將來都唔會完結。
海迪