這是最好的時代，也是最壞的時代。
香港電影擁有過輝煌歷史，由新浪潮崛起到經歷黃金年代，到走過黑暗歲月，至現在合拍片興替，導演就好像行軍主帥一樣，主宰着港片的命運和方向。然而隨着合拍片大行其道，「香港導演」這四字或許在歲月流逝。香港導演會副主席陳嘉上正好見證港片興衰，他認為港導有必要轉型，若要成就契機，亦要學會跟老闆說不。
撰文：何永寧
香港導演會籌備出版一本名為《香港電影導演大全當代篇》，網羅約600名自79年到現在的導演，導演會副主席陳嘉上跟《香港電影》一書總編輯黃國兆，日前在導演會辦公室接受本報記者訪問，陳嘉上想大眾知道港片是由甚麼人構成，他說：「港產片成日講，咁到底港片由乜嘢人組成？希望本書可以概括到為電影出過力嘅導演。」由79年開始收錄，是因為那年正是新浪潮電影起始，陳嘉上也是受到那股浪潮的啟發而入行，他說：「當年喺外國讀地理、副修天文，同電影完全冇關，有一次入戲院睇咗章國明套《點指兵兵》，發覺原來粵語片已經唔再停留喺家嫂、奶奶，係一個全新角度，好有現代氣息，即刻去邵氏考助理製片，記得400個人請咗4個，其中一個取錄者仲係今日數碼電台嘅股東何國輝。」
捨難取易左抄右抄
陳嘉上先後做過道具、場記，最難忘做過張徹的助製，他說：「仲記得部戲叫《五遁忍術》，記得咁清楚因為真係好開心。」入行沒多久，他便見證了香港電影的黃金年代，他表示當時拍戲十部有九部賺錢，但卻感覺到前所未有的恐懼，他說：「你攞住劉德華個名就有老闆開戲，又有鄭九組（鄭裕玲）出現，連攝影師都俾人搶，嗰段日子你可以話係最好，亦可以話最差，好多工開，但好少好電影。如果你部戲拍得耐，老闆會問『點解人哋五星期拍完，你要拍三個月呀？』」
賺錢的是老闆，但創作人的空間很少，很多時更逼你去抄，他說：「我見過一個劇本30個分場，全部都係片名，呢度抄啲嗰度抄啲，抄到完場。」陳嘉上形容當時是自己最驚的時候，電影人都捨難取易，他第一部作品《三人世界》沒有人肯剪：「因為現場收音難剪，最後要搵個學師嚟剪，係港產片紛亂嘅時候。」
合拍片引港導轉型
陳嘉上續說：「一直到80年代中後期，我同陳可辛、爾冬陞坐低傾問點算，因為我哋驚到不得了，戲仲係賣錢，但知道觀眾已經好唔滿意。」
電影工業往後由盛轉衰好一陣子，直到03年中港實施更緊密經貿關係（CEPA），港片儼如覓得第二春，由合拍電影帶起。
然而提到合拍片，大部份人都先入為主地搖頭，陳嘉上認為不應將其標籤，亦不必視之為洪水猛獸，他解釋：「香港導演好聰明，佢哋知道香港人要乜、內地人要乜，有啲片係擺明拍畀內地觀眾睇，我套《四大名捕》都係。你要知道本地導演待遇同國內導演唔同，國家級導演坐飛機一定坐頭等，係國家規定，就算佢啲戲冇觀眾睇都唔影響佢地位，香港導演你冇觀眾直情冇得撈，呢方面係港導演要考慮，許鞍華同王家衛係呢個工業裏面少有生存到嘅藝術家。」
合拍片被指一成不變，不過陳嘉上覺得這個觀念近年有改變：「內地審批有改善已經係老生常談，改變嘅係生態唔同咗，以前拍合拍片有一條方程式，好似煮嘢，你有周迅加葛優，搵個大導演開戲就實賺，𠵱家觀眾話畀你聽唔得呀。好似舊年馮小剛套《1942》，對唔住喎，我生活已經好苦，所以唔想入戲院睇人食人啲咁慘嘅嘢。你話成龍加李連杰好犀利實收，係事實，不過呢啲唔係創意，荷李活有錢咪請到囉。」
要學懂向老闆說不
內地觀眾越來越識看戲，大卡士、大製作已經不再是票房保證，電影再次回復到創意工業範疇，是陳嘉上看到合拍片的出路，亦是港片的契機：「講諗頭、創意同執生，香港導演無出其右，走出必賺嘅框框逼你班人諗多啲新意，《寒戰》、《歲月神偷》係最好證明。」令中國電影商業化是導演當今要走的路，導演更要學懂對老闆說不：「老闆永遠乜都想要，要識同佢講唔好，有時真係要鬥大，我之前幾套片都拍過幾次枱起身，你要畀佢知乜嘢係觀眾想睇，而唔係老細自己想睇。」
陳嘉上跟黃國兆的《導演大全》暫定於6月尾面世，一書兩冊中英對照，黃國兆表示在編集上遇到的困難主要是有些導演資料不齊全，他說：「因為有啲導演只有一部作品，佢哋亦唔屬於導演會聯絡唔上，呢個係目前要克服嘅問題。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/