咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【咖喱篇】諗住寫熱刺過分依賴加里夫巴利，但咁啱睇到加利尼維利最近嘅專欄，話家陣足球經理人嘅制度透明度唔夠，除咗應該公開所有球員嘅薪酬，仲要球會列出各項畀經理人嘅費用。
加利仔冇點名話某某經理人，但小弟就諗起C朗同摩連奴嘅經理人文迪斯。之前睇篇報道話，文迪斯嘅子弟已經滲透晒西甲，有10支球隊有佢嘅球員，其中拉科魯尼亞有近10個，皇馬都有5個，其餘8支球隊加埋都有成十幾個。
講起文迪斯，相信大家都聽過佢同皇馬千絲萬縷嘅關係，但其實佢對護級球隊嘅影響仲大。上季薩拉戈薩護級成功，就係靠文迪斯幫手；喺舊年1月，薩拉戈薩借到3個文迪斯旗下嘅猛將幫手，其中艾邦奴表現好好，入咗好多波。今季，文迪斯再出手，目標係佢嘅大客仔拉科。佢哋喺季中炒咗奧迪亞，即刻搵咗杜明高斯做教練，後者其實係文迪斯旗下嘅教練；到冬季轉會窗班救兵，拉科亦透過文迪斯借到馬體會嘅施維奧文奴。
講笑咁講，如果文迪斯想操控賽果，真係易如反掌；西班牙嗰邊有單傳聞，大家可以當花邊聽吓。話說舊年12月初，美斯即將打破武勒嘅單年入球紀錄，文迪斯覺得俾美斯搶晒風頭好冇面，當佢見到馬體會對拉科係同巴塞場波同日舉行，就生出一個念頭；喺佢「安排」下，旗下嘅法卡奧一場入5球，結果喺翌日嘅報道同美斯平分秋色。孰真孰假，無從稽考，但空穴來風，足見傳媒同球迷都覺得佢勢力非常大，隱然成為一個在西甲嘅第3班霸。