過年前被搣柴、冇得做政協嘅新地（016）非執董郭炳湘（大K），選擇喺農曆新年期間外遊散心，同時佢亦搵番前傳媒人陳慧兒（人稱「老師」）幫手做公關，可能唔知新地案件點發展，搵定多一、兩位公關幫手，費事到時搞到人仰馬翻！
老師幫大K做公關好多年，基本上自新地08年爆出大股東爭產風波，佢就幫大K做發言人。舊年9月，佢忙住搬屋，兼且想休息吓，就辭咗呢份工，大K於是轉搵另一位前傳媒人Adrian Cheung幫手。
事隔半年，過年前，大K碰見老師，再誠邀佢幫手，希望老師同Adrian一齊幫佢應付傳媒，多個人多啲計仔咁話。老師同Adrian本身係朋友，加上幫大K多年，大K開到聲，佢都冇話say no。新地案件下月8號再提訊，睇吓老師到時使唔使出招嘞。