專賣日本零食嘅阿信屋，最近食正日圓弱勢，「阿媽」CEC國際（759）升到你唔信，就連股壇老手都忍唔住食咗糊先。
聯交所資料顯示，CEC獨董區燊耀年初五開市以平均價0.9元沽100萬股CEC，翌日再以平均價0.975元沽40萬股，夾埋套現129萬。
CEC上月初只係0.58元，累計升近七成，睇落係靚價沽，勢估唔到CEC噚日再升近兩成，收報1.21元，區燊耀沽呢140萬股，賺少40.4萬呀。
好在區燊耀仲揸住近370萬股，市值447萬，可以善價而沽，話晒66歲，唔使激心住，身體要緊。呢位獨董亦唔係等閒之輩，88至94年任聯交所理事，92至94年係香港結算副主席，名副其實係股壇老手。股壇老手都沽貨，究竟係佢沽早咗，還是沽貨訊號呢？