雖然晉佳睇好內地醫藥行業，但近排醫藥股全線升，基本因素就唔係隻隻好，個別track record麻麻嘅公司睇怕遲早露底，喺股價累升咁多嘅時候，唔太值得買嚟持有囉。
去年6月至今股價升咗一倍半嘅中國製藥（1093），早喺去年6月宣佈以89.8億元，向大股東MGL收購成藥產銷業務，以收購目標2011年盈利約3.14億元人民幣計算，收購市盈率達23.4倍，認真貴。中國製藥同時發行咗價值67億元嘅換股債畀大股東，換股價2.15元，即係未來最多被攤薄多31億股，擴大後股本可以去到58億股，以前收市價3.17元計算，假設換股債完全行使，市值就去到184億元。
舊業冇運行 新業務難測
按2011年盈利計價，中國製藥傳統藥業盈利2.33億元，新增業務盈利3.14億元人民幣，粗略計算攤薄換股債後嘅前年市盈率係30倍，值唔值呢個價？細心睇佢業務就發現去年上半年，中國製藥賣全行做爛市嘅低端產品維生素C、抗生素佔收入六成，佔收入四成嘅成藥唔見得有增長動力，所以上半年固有業務要蝕1.37億元，呢part好難有前途。
至於啱啱買番嚟嘅新成藥業務，主要係產銷醫藥化學品、開發醫療技術同投資、管理醫藥項目。簡單啲講，舊業務冇運行，新業務就好似有睇頭，但盈利可測性低。
中國製藥呢單收購，包括咗產銷中樞神經系統藥物嘅恩必普。公司曾經喺2009年以資產交換形式，將恩必普售予大股東，作價1.25億元，但之後恩必普喺2010及2011年，分別賺1,399萬元同1.06億元人民幣，2012年上市公司用差唔多90億元，向母公司買入包括恩必普在內嘅業務，而恩必普就佔整單收購項目嘅盈利三分之一。簡單啲講，中國製藥09年低價賣走恩必普，後者盈利大升之後，中國製藥就用高價買番，唔益小股東。
睇嚟做佢小股東，長遠真係冇着數，至少晉佳對佢冇乜好感，藥股當睇少隻。
晉佳
小啟：王昇外遊，晉佳代筆