愛港力陳淨心上《議事論事》一句「關你叉事」，成為新春政治爆笑事件，愛港力呢班激進梁粉不嬲搞嘢，上次遊行阿叔打now記者，之前反國教與學民思潮對罵。好多人唔明呢班人喺邊爆出嚟，點睇都唔似主流建制派。
愛港力上位，值得香港人注意，我認為應係內地維穩機器在港活動伸延，意義重大。過去20年中央介入特區事務，均是以政治代理人方式，自九一直選以來，全力培育民建聯，壯大佢哋在各級議會及選舉政治中的影響力。呢種間接管治模式嘅前提，係建制派也要跟主流香港一套遊戲規則去玩，唔能夠設立一套必勝規則，公眾至少見到玩法係公平公正。20多年過去，民建聯成為最大建制派，理應是政府執政黨或最大政治支持系統。
新紅色力量 中聯辦指揮
但舊年一場假選舉，梁振英用謀略奪取政權，而背後支持他上位的，卻非民建聯，當時進入泥漿摔角階段時，曾鈺成甚至有意出選，以阻止惡質政治出現，結果換來梁振英致電問候他個人黑材料，明關心暗恐嚇。民建聯與梁振英由始至終均非真誠政治聯盟，只是阿爺撮合之怨偶。到梁振英去年6月開始陷入政治危機，支持梁的幕後力量要發功撐住，但又不能靠民建聯，於是便出現了一班新紅色激進梁粉。
梁振英背後支持系統，與新界鄉紳、青年及社團工作有關，上次臭格$250買fans事件，涉事者乃新界商會。《陽光時務》曾做過一個叫新紅色勢力專輯，揭愛港力底牌，指陳曾是「新界青年聯會」副主席梁錦培的助理，該會的榮譽贊助人是中聯辦主任彭清華，榮譽顧問包括中聯辦青年工作部部長韓淑霞、行政長官梁振英等。
過去主流建制派多少要照顧自己政治形象，言論及行為唔可以太激，因此被視為太溫和，而愛港力及剛在港大學生會改選風波引起關注的「香港各區專上學生同盟」，均被視為新紅色力量，直接由中聯辦指揮。
梁依靠新紅色力量，後果係只會更形孤立，曾鈺成一系更加袖手旁觀，睇你點死，而梁的政治形象就更加不堪。
添馬男