夾band、搖滾唱出自己聲音引發社會共鳴，在今時今日商業社會買少見少，要做到不受大氣候蠶食和影響，只有靠心中對音樂的那份堅持，在樂壇有香港搖滾之父美譽的夏韶聲一直忠於搖滾，但首本名曲如《空凳》、《交叉點》跟rock歌唱反調，搖滾之父身份有如無間道。
撰文：卓寶花
背着結他、伴着音樂就是夏韶聲（Danny Summer）的人生，天生擁有一把沙沙的聲線，配以粗獷外形，就是他當年搖滾起步的形象，但他能夠hit的歌並不是想像中吵耳的音樂，反而是抒情歌；但同時夏韶聲同樣踏上搖滾之路，更加入一隊日本band叫Blues Creation，真正成為band友，並與Blues Creation一起巡迴。
香港樂隊難生存
夏韶聲坦言在音樂路上的人生常有矛盾：「Hit嘅歌《童年時》，《結他低泣時》呢啲都唔係rock歌，喺八十年代興偶像，興嘅歌唔會係rock歌，電台唔會播，因為我當年去咗日本，有機會同日本搖滾之父一齊合作，加入咗Blues Creation，竹田和夫就係我師傅。」夏韶聲背上搖滾之父之名，他笑說：「個名𠵱家用嚟為民除害，叫你做『之父』，即係有責任去幫後一輩，初時叫我搖滾之父都驚，點知一叫20幾年，唔父都父啦，但我係第一個中國人打入日本。」
經歷不同年代洗禮，面對歌曲商業化的現實，夏韶聲說：「我冇乜點變，一隻腳踩住pop，另一隻腳踩住rock，身份好無間道。」從前夾band收入可觀，跟現在不能相比，夏韶聲說：「以前多地方生存，𠵱家少咗空間，六、七十年代菲律賓歌手當道，薪酬好貴，後來先有仙杜拉、杜麗莎出現，再後期多番中國人，又有台灣嘅姚蘇蓉《今天不回家》，就變咗國語歌當道，香港多咗歌星，少咗band。」
在八十年代，夏韶聲開始擔心97回歸問題，曾寫了一首歌《說不出的未來》，作品開始被指涉及政治，在演出時被罵叛徒，夏韶聲說：「我只係唱出心裏聲音，當時真係擔心97，同政治無關。」到1990年因為父母下令要他返回美國，身為獨子的夏韶聲暫居美國，但始終熱愛香港生活，於是美國香港兩邊走。
夏韶聲近10幾年以獨立歌手身份亮相，他看透樂壇政治：「我冇大公司宣傳，只靠身邊人幫手，大騷一定唔會見到我哋呢類人，我冇簽畀無綫，《勁歌金曲》唔會畀獎我，我亦唔會為咁而簽佢哋。」
經歷第四段婚姻
現年61歲的夏韶聲經歷第四段婚姻，妻子現居於美國：「婚姻狀況唔係咁好，但個人就好開心，兩個女都生咗仔，大孫已經3歲，細孫幾個月大，我好鍾意同佢哋玩，仲教大孫彈結他。」
夏韶聲近年經常出席節目分享對UFO的理論，吸納了大班年輕粉絲，他表示自己是人馬座，好奇心超強，2011年推出一本講述外星人和UFO事件的繪製漫畫書《天眼》，集合科幻趣味。夏韶聲特意在好友位於觀塘的工作坊內設了一個角落，將他的珍藏寄賣，包括有坦克車模型、太空人人形公仔、以及個人作品，很多都是絕版的。
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/