上周足球評述員協會在山度士的足球學校進行賀歲波4角賽。對手包括一隊女子足球隊，和由一班退休人士組成的兩支隊伍。以為可輕舒腳頭踢歡樂足球？錯晒！
由於協會有小弟在陣，不得不找來林慶麟、劉健基等強手來增強實力，但首場便陷苦戰！對手平均年齡雖比我們大逾十年，但技術猶在，配合一流。除門將反應仍像十八廿二，印象最深就是那位穿白飯魚的中場大叔，腳法秀麗長傳到位。可憐協會客串門將強尼，由台前棟篤笑、球彩講賠率都難佢唔到，偏偏就被這位大叔中場「笠死」。相信強尼今日真係學到好多嘢！
另一場對女子隊，更加唔講得笑。一來對手部份屬香港代表隊成員，雖是女孩子，速度、走位、傳送技巧猶勝鬚眉。二來還有一位猛男助陣，正是山sir御駕親征！我們一開波先入一粒，山sir即話：「好！你哋入一球，我哋入一球！」隨即發號司令，後場一記長傳，回頭一望，山sir已走到禁區角接應，凌空窩利抽射！可惜省中楣角，見個龍門框震到呢！兩屆香港足球先生風範，真係做觀眾仲抵！大家入球梅花間竹，邊隊贏都唔記得喇，只記得「足球係男人嘅世界」同「拳怕少壯」兩大定理，已打破晒！
方柏翹
now足球評述員