消息指財爺將推出第三批通脹掛鈎債券（iBond），總額照舊100億銀。還記得舊年6月次批iBond推出時，唐牛叫大家買股好過，該批iBond連同派息至今回報僅9%，期內盈富基金（2800）勁升22%，還未計股息，回報高下立見。至於今次抽唔抽得過，唐牛覺得現階段股市潛在爆炸力比舊年6月肯定細得多，將部份喺股市贏番嚟嘅錢轉投iBond，既可有穩定利息收入，又可鎖定利潤，抽iBond絕對合理。
A股今日復市，中資股上周五已蠢動，為「開門紅」做好準備，其中信義玻璃（868）搶高4%，較大市早一步突破前浪頂，強勢畢呈。截至去年6月底，信義半年賺4.8億銀，按年跌43%，主要受累玻璃跌價，惟隨着城鎮化啟動，建築及汽車玻璃等需求肯定大增，利好玻璃價回升，信義盈利有望見底。此外，市況轉旺，信義勢重提分拆太陽能玻璃業務，價值將進一步釋放。信義上周五收報5.69元，可候回試5.60元吸納，博破位後再上。
唐牛