一年一度「渣打馬拉松」嚟緊周日（24號）起步，參賽者近日除咗積極練跑，仲要準備戰衣。強國品牌特步（1368）舊年首度贊助大會跑衫，搞到人人哇哇聲，話着咗似史力加，寧願私伙上陣。第二年贊助渣馬嘅特步聽到大家嘅聲音，今年件跑衫「正常」好多，主要係白色底襯漸變藍色，都算着得過。
好彩唔係螢光綠
特步首席財務官何睿博噚日解釋，話舊年首次贊助，要遷就主辦單位配色，顏色方面好難話事，有啲卸責喎！之不過，公司聽到聲音，知道跑手對件衫嘅顏色配搭有意見，加上第二年合作，多咗時間同主辦單位傾設計，今年件衫嘅用料同設計都有改善。
今年特步總共設計咗三個款式，何睿博本人最鍾意一件螢光綠嘅，香港業餘田徑總會就揀咗𠵱家呢款。睇到呢度，相信好多人都鬆一口氣，暗讚田總代表有眼光。綠色已經蝦人着，仲要螢光綠？咪玩啦，一支支螢光棒跑步咩？！
特步想贊助一世
講到贊助費，何睿博就三緘其口，淨係話每件跑衫成本50至100蚊，今年7.2萬名跑手，粗略計算都要360萬至720萬元，仲未計喺地鐵站賣廣告嘅開支。照咁講加加埋埋千萬計冇走雞。
特步舊年從New Balance手上攞走渣馬贊助，都係想做宣傳啫，渣馬係本港體壇盛事，跑手人數年年增加，今年仲有幾千名海外跑手參賽，特步嘅知名度隨時有機會「走出去」，難怪何睿博表明心迹，話想永遠贊助渣馬，一生一世咁話。
李華華
mailto:[email protected]
新game出爐 ～ 快啲試下自己有無辦法上車啦！
【「樓」年運程小測試】
http://www.tomonews.net/game/hkhousingpolicy/