唔少人新年同親朋戚友聚首一堂，都會唔覺意「食大咗」，放完假先發現自己條褲好似緊咗。民主黨單仲偕出名識飲識飲，仲要有個入得廚房嘅太太，八方以為佢新年應該猛食好嘢，點知佢話要減肥喎。
單雞呻，早前佢去做身體檢查，醫生話佢超重，要至少減10磅先達標，所以無論單太煮幾多好餸都好，賀年美食當前又好，都要忍吓口喇。
單雞兩個囝囝都喺美國讀書，農曆新年冇假放，不過八方噚日去佢屋企拜年，話題都離唔開佢嘅寶貝仔。單雞話大仔子曦同細仔子灝，都喺5月尾到6月初畢業，佢唔想缺席立法會會議，亦唔想缺席囝囝畢業禮，惟有喺嗰三星期內美國、香港兩邊走幾轉啦。咁睇嚟單雞要減磅，話都冇咁易。