新年𢭃利是係指定動作，但幾千人排隊𢭃利是真係好少見。騰訊（700）深圳總部噚日早上出現一條超長人龍，皆因老闆馬化騰派開工利是，於是就出現呢條由公司排到落地下、超過5,000人嘅長龍。
騰訊闊佬 派完再派
聽聞，騰訊每年新年都會自動過數200蚊（人仔．下同）畀員工做利是，騰訊約有1.7萬名員工，淨係利是錢都三百幾萬。之但係，馬化騰同一班高層依然會向嚟拜年嘅員工派現金利是，金額就唔多清楚，聽講由50蚊到100蚊都有。
騰訊呢條利是人龍舊年已經好出名，或者學星爺話齋，好多打工仔過完年都係「年初四咁嘅樣」，假又放完、錢又使晒，咁梗係要𢭃封利是幫補吓啦。