西九文化區啲硬件設施未有耐落成，仲係空地一片嘅西九海濱都一樣有文化表演活動。西九管理局同香港中樂團噚日就喺西九搞咗個「澎湃鼓樂迎新春」，顧名思義，活動其中一個重點係宣揚鼓呢種源遠流長嘅樂器，最矚目係會場中間豎立咗一個直徑達到3.47米嘅祈福大鼓，任何人企埋去都變小矮人，而署理特首林鄭月娥主持活動開幕禮時，就負責擊呢個大鼓三下，象徵幫香港祈福。
其實林鄭打呢個祈福鼓都有一段故事，03年沙士襲港期間，香港中樂團喺維園舉辦咗個《香港鼓樂節》，希望激勵人心，當時就係由祈福大鼓負責帶動全場3,000幾人一齊敲鼓。轉眼鼓樂節亦已經辦到第十屆，中樂團特登擺祈福鼓出嚟紀念。