【沙士疫變10年】
【本報訊】十年前，沙士攻陷九龍灣淘大花園，全港染病的1,775人中，329人為淘大居民，42人因病去世。淘大花園淪為疫區，一片死寂，生人勿近。十年過去，淘大花園髹上橙紅顏色，U形水管早已更換，商場人流勝舊時，沙士陰霾看似煙消雲散，但對於經歷疫潮的當事人，不提起，不代表已忘卻；不提起，只是不願回憶。
記者：嚴敏慧 陳凱迎
封樓隔離如坐監
「好似拍《生化危機》」
「點解要留住張隔離令？你冇病、冇痛、冇犯法，俾人困住十日好似坐監咁，你keep唔keep住張證據先？」淘大E座舊住戶葉先生（圖），至今仍保留03年政府發出的隔離令，封樓情景歷歷在目。
「金錢唔再重要」
「一班人着晒生化衣拍門，好似拍《生化危機》咁」，年少氣盛的他得悉要隔離十日，即時要求報警，一名生化衣人突然行前，拉開保護衣露出警察制服說：「我就係差人」，才令他接受現實，展開隔離生活。
葉先生當年是E座業主代表之一，與同座居民相熟，解封後曾逐層探訪，「點知見到好多戶門外都點咗白蠟燭，好慘情」。
當年曾獲國務院總理溫家寶上門探訪、在沙士中太太去世、留下一名剛出生兒子及長女的郭善雄一家，葉先生亦認識，「事後一年都仲有聯絡，之後搬咗電話改晒，再搵唔到佢哋，相信想離開呢度忘記件事」。
十年人事幾番新，淘大樓價亦翻幾番，葉先生98年以180萬元買入近500呎單位，沙士期間跌至70多萬；近年樓價急升，2011年底他以260萬元把單位出售。沙士一疫改變了葉凡事向錢看的做人態度：「沙士後覺得金錢唔再重要，因為一下子可以乜都冇晒」。