今年1月初盈富基金（2800）沽空大增，之後恒指升得好慢，非指數股則喪炒，事後孔明就知道大戶一面炒個股，一面沽指數做對沖。事隔個幾月，盈富上周四沽空率又大升，不過𠵱家個股升咗唔少，進一步搶升空間肯定唔及1月，但只要吼中一兩隻二三線股，兩日升一成已經好唔錯。
要搵有潛質爆上嘅二三線股，晉佳寧吼低位整固完畢，似再起動嘅股份。鐵貨（1029）1月中因大折讓配股，單日急瀉18%，之後進入整固期，股價連續九個交易日穩守1.10元，上周五買盤轉趨積極，升近半成似乎有機再起動。
鐵貨1月配股畀內地鐵礦石貿易商俊安同埋五礦，作價0.94元，較前收市價1.42元，大折讓34%，令投資者信心受打擊係咁掟貨。以上周五收市價1.16元計，較配股價高23%，現價入場，溢價變得唔算好高。
預輸兩成博升逾倍
鐵貨主要喺俄羅斯開採鐵礦石，然後出口去其他地方，之前冇乜錢賺，但隨着鐵貨產量大幅提升，加上鐵礦石價格反彈，業務有能力漸上升軌。單計去年第四季，鐵貨表示鐵礦石銷售超過預期達到29.65萬噸，按年大增54%，業務膨脹速度比預期快。
業務性質相近嘅中國鐵鈦（893），去年11月宣佈私有化計劃，每股出價1.93元有啲孤寒，但足以證明幕後極度睇好鐵礦石行業，所以要收番間公司慢慢享受。咁樣睇嚟，如果鐵貨盤生意正正經經，未來都肯定有非常唔錯嘅機遇。
講咗咁耐，其實最關鍵都係盤生意究竟係唔係正正經經。單計近期趨勢，鐵貨產量爆升應該能夠令市場對佢信心增加，係好兆頭。就當間嘢業務係虛嘅，趁鐵礦石價格復蘇浪潮，產量又急升，大戶炒高個價博人信佢盤數，都實有大把人信，一樣有條件升到爆燈，所以買股票都唔一定要買啲好實在嘅嘢，預輸兩成鬆啲（明顯跌穿0.94元即止蝕），去博升一倍甚至更多，都一樣值得試。
晉佳
本欄逢周一、三及五刊出