沙田陳太問劉皇發為香港求得之下籤解一解，左丁山睇番過往自己之新年求籤紀錄，係幾得人驚嘅，昨日講過三支下籤，皆係個人實事，還有一次就係在2000年二月五日年初一。當時科網股方興未艾，人人有個發財夢，平時唔識電腦係乜之人也搵到創投基金支持搞網站，左丁山因此而做過幾次中間人，介紹一啲「科技股」搵私募基金㖭，中七預科生個個話要報讀電腦、IT工程，好不狂熱，發達似乎好容易。
2000年年初一，左丁山求財就係求到劉皇發在今年年初二攞到嘅下籤，「駟馬高車出遠途，今朝赤腳返回廬，莫非不第人還井，亦似經營乏本歸。」當時得此下籤，心裏有數，做科網公司顧問，只收現金，絕對拒絕對方以股票代支（其實當年矽谷幾流行，送Pizza嘅靚仔都情願收科網公司認股權而唔收速遞費），但即管如此，最後還是給一間科網公司走數，嗰間公司破產後，清盤官寄來文件要左丁山間公司填報索償，直情係嘥時間。
今次見發叔求到第95籤，有人解話慎防小人，多餘啦，何來小人呀，依照2000年經驗，慎防市場出現泡沫爆破就更加似啲，愈係高調發財之人，愈要因住赤腳回鄉，尤其是嗰啲大吹大擂往海外投資嘅公司，信唔過，今年買股票或投資，還是搵一啲穩健低調而資產負債表紮實嘅公司好，或者此是老生常談，但既然劉皇發代車公示警，更加要信。「駟馬高車出遠途」有可能係充大頭鬼而已，借錢買私家飛機、勞斯萊斯出入之人，尤其不可信，習近平早有示意，要反貪倡廉，不准奢華，若有不識相之內地富豪/高官仍要「駟馬高車出遠途」，瓜多過菜，雙規大有可能。
聽練乙錚講，「雙規」兩字甚為敏感，少講為妙，免收律師信。沙田陳太聽咗一輪，似信非信，卒之講：「算吧啦，唔信得咁多，好彩我住在沙田，沙田鄉委會為沙田求得上籤第60，即係車公保祐沙田啫，沙田樓價會唔會升呀？」吓，咁都可以扯得上樓價？籤文話：「賢路晴明此日開，三千才子赴京臺，人逢亨通知如意，金榜標名萬古傳」，講功名多過講樓價噃，沙田有中文大學，又有最多英中，沙田學生今年考試可能有三千人考到入大學都唔定！