【中環】甄子丹呢排忙緊拍電影《冰封俠3D》，仲要身兼男主角同武指兩職，忙到甩轆，前晚10點幾佢喺中環永利街附近長樓梯開工，呢晚佢唔使拍戲，化身武指教動作演員做跳躍同武打動作，認真一腳踢，仲吸引咗大批途人圍觀，連老外都企街睇埋一份。
子丹對每個鏡頭都嚴格，又親自教動作演員做表情同反應，仲落手落腳示範揮拳動作，功架十足，現場幾位動作演員同工作人員都細心聽佢吩咐，拍攝過程好順利。
搞婚禮𠱁老婆
另外，噚日下晝甄子丹就去銅鑼灣出席活動，戴黑超出現嘅佢個樣好攰，佢話：「每日開工十七粒鐘，有排先埋尾，仲有重頭戲未拍，呢部戲係大製作，要求好苛刻，自己都希望動作場面有突破。」8月30日係佢同老婆汪詩詩結婚十周年紀念，呢日佢會搞個完美婚禮送畀老婆，子丹話：「未必豪華，太太最緊要我有誠意同心思，佢好易𠱁，愛佢一萬年就得。」
採訪、攝影：彭琮然、羅德光、魯萍
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/