【本報訊】特首梁振英上任逾半年，仍未獲得商界「歡心」，自由黨榮譽主席田北俊一字一頓，吐出商界主要是針對梁振英「冇．料．到」，幾乎「當佢冇到」。除因梁振英個人經驗不足，也因「叻人」拒與他為伍，以致班底「唔掂」，難怪連市民也質疑：「你咁樣嘅特首，咪只有搵到咁嘅人同你做局長囉！」田少寄語梁振英：「最緊要咪自以為好有料喺度搞搞震。」
記者：許偉賢
梁振英上場後，不時有商界批評梁班子施政，他與商界的關係，遠不如前兩任特首。本身是地產商的田北俊接受訪問時坦言，商界仍對梁振英有戒心：「商界整體嘅睇法，我覺得唔係針對梁振英嘅政策，而係針對佢：冇．料．到。」「佢（梁）所做過嘅嘢，只不過係測量方面嘅嘢，所謂專業範圍好大㗎嘛，從專業角度講，佢都唔係咁多經驗，又冇做過商會主席、金融方面都冇經驗。」
田續稱，商界內遍佈有能力的叻人，「啲叻人梗希望有個叻過佢嘅人做特首」，「佢哋覺得，如果呢個人士都冇乜料嘅，我都睇佢唔起嘅，咪唔支持囉，大致上好多人（商界）都係咁嘅睇法，特別係佢（梁）個班底都唔掂。」
你冇料到，我哋咪自己搵食，最緊要咪自以為好有料喺度搞搞震
梁班子有幾唔掂？田北俊舉例指，政府銳意以提高額外印花稅稅率（SSD）及延長適用期壓抑樓價，但此舉令市場供應量減少之時，市民需求卻依舊多，樓價「焗住升」，「呢啲咪弄巧反拙」。他強調：「商界對佢冇乜期望，等香港做好啲、多啲商機？佢邊度掂吖。你冇料到，我哋咪自己搵食，最緊要咪自以為好有料喺度搞搞震。」問及商界是否不放梁振英在眼內？田搶着答：「啱吖、直情係。」
田北俊認為，中央須為梁班子唔掂負上一定責任，因為中央在選舉初期，一直予人支持唐英年的感覺，「所以社會上嘅精英，最叻嗰啲人，一面倒去晒唐營；咁CY出嚟選，就好難搵人肯埋佢堆，剩番啲佢可以搵得嘅，就唔係任何界別最標青嘅人」。
結果梁振英「埋班」後，醜聞天天新款，田也嘆道：「佢（梁）自己班底嗰啲，做到（局長）嘅全部問題多籮籮，一出嚟日日上新聞，市民梗係質疑：你咁樣嘅特首，咪只有搵到咁嘅人同你做局長囉。」田少重申，自由黨當時寧投白票亦不投梁振英，便是擔心其班子的質素。
曾經預言梁振英未必做足五年的田北俊稱，若從香港大局着想，「我都希望唔使換（特首）」，以免社會不穩，指梁振英若能在任內搞好所有問題，落實曾提出的惠民政策，仍可在2017年爭取連任。
