雲集抗共、挺共精英嘅《城市論壇》，向來熱烘烘，噚日討論2月27日公佈嘅財政預算案，輪流講吓願望咁，點知都搞到面紅耳熱。事緣抗共嘅維園衝鋒「大陸朱」發言時，希望政府多發展其他產業，不要獨沽一味搞房地產，但挺共嘅維園阿伯不斷叫囂，批評佢用自己個朵嚟揶揄內地人係「大陸豬」。
64歲嘅大陸朱真係來自大陸，原名朱韶洪，當年因不滿共產黨而偷渡來港，「當年1972年，我只係23歲！因為對共產黨有認識，就知道共產黨係冇前途。英國人嘅管治就高明得多」。佢比維園阿伯更愛國，當年保釣烈士陳毓祥去釣魚台宣示主權，大陸朱就係隨行一員，原來佢仲係「保釣朱」。