今年難得留港過年，沒有了舟車勞頓，假期也好像過得特別長，街上的人少了（只限早上），天空比平日藍了、幫襯開的快餐店年初一竟然休息了、遙遠的林村人頭竟然多過大球場了，少見所以多怪了。
年初二晚在住處地庫的酒樓吃開年飯，8點左右聽見微弱的煙花之聲，大人們卻懶得稍移玉步到戶外趁熱鬧，原來無論是國內的又或是本土的朋友都睇厭咗，反而是幾個仲未夠歲數自己去街的小朋友結黨離開飯桌跑來跑去，睇煙花是煙幕，自由奔放才是主題。
有些活動是歧視孤獨精的吧，譬如說應該不會有一條友出街睇煙花的情況（龍友除外），反而是良心商戶好嘢，情人節晚竟然推出一人套餐，有冇人幫襯係另一回事，但亦聽見唔少單身貴族三五成群為single乾杯，一樣玩得咁開心。
當各式各款電子遊戲都由獨樂樂走向眾樂樂嘅online模式時，似乎只係剩返跑步呢味嘢係最適合一個人嘅活動，明明係自己顧自己嘅自我體驗，但係偏偏每年馬拉松嘅第一焦點就係今年比去年多咗幾多人參加，事實最強嘅「𠱁你入局」方法，就係來自peer group嘅動力，referral從來係最佳開新客嘅途徑，歷史尚未算悠久嘅渣馬，每年人數不斷增加都仲係多得好多一班班趁熱鬧嘅朋友，有啲約定之前一晚唱K直落，有啲等埋跑完（或行完）之後一齊飲茶兼按腳，嘉年華式的心情去迎接馬拉松固然係happy，但若果大家唔將跑步呢家嘢慢慢內成為自身興趣的話，恐怕只會係三兩年貨仔。
跑步係一個人嘅事，不過每次比賽前後總有幾種好難頂嘅感受係人哋畀你，第一種係開跑前三急事件，細細個響陸運會時，每次最後召集之後都要屙多一屙，唔係只得我一個，當年同我一齊跑嘅同學仔又話急，仲開大㖭，結果我跑完返來佢仲未屙完。
另一款畀人影響嘅情況係步速，最大件事係見到人哋慢晒軚開始行，你就自不然會被誘惑，不如唞陣啦，有次見到前面有人退出，我幾想扮好人走埋去扶佢，然後大個藉口幫人所以上岸呀，可惜，有人快我一步！
keyman
now TV主持
mailto:[email protected]