與劉以達做訪問前，記者已有將「被遊魂」的心理準備。結果兩小時傾談中，他結巴的演繹，清晰的思路，遇到敏感話題又懂避忌，而且識時機詳述來年音樂大計，更有即時糾正記者的謬誤，原來他更擅長考驗記者欲揭開「賣儍」面具的功力。只在不經意間，他才輕描淡寫帶過，過往多年未有過損手的買賣物業經歷，你真當他儍？
記者：李芳芳
常人眼中浮游神化的達哥，本月27日便滿五旬。五十而知天命，浮沉過後，達哥依舊認為音樂路最有希望，近期積極推廣自資發行的唱片，揚言今後每年都會出一張。作為頭炮的新碟《第四度空間》，將在大壽宴當日舉行的音樂會上推出，同日亦紀念與太太15周年的婚姻，美名「三喜宴」。
過往多年做過不少賠本生意，無論是80年代首次夾Band開騷，同人夾份開Label（音樂公司）紅貓娛樂做配樂，還是後來組過多支寂寂無聞的樂隊，以及06年試過因與經理人鬧翻而耗盡為出碟的九成積蓄，達哥都吃過不少蝕本收場的苦頭。但上天總在適當時候眷顧他，正如他無師自通的音樂和繪畫才華。
做騷較易搵到錢
劉以達的信心早已回籠，「唔做音樂，我可以走去畫畫，但依然覺得音樂可以畀我講好多不平嘅嘢。喺唱片裏面所有歌都要跟足……英倫搖擺、迷幻音樂……用呢啲風格去玩，但歌詞寫到好正面，係絕對可行嘅。呢個市場未開，我係先鋒……有一半係想傳福音碟，另外嗰半係想搵錢，但起碼唔會蝕。」一坐低，他便主動談起要自資潮玩福音的大計。
「香港人唔會嘥百零蚊去買張碟聽，喺音樂行業點樣先維到生計，甚至發達？我唯一諗法就係當我做晒啲新歌，可能儲一、兩年，有三隻碟，集齊新舊歌，就係咁去做騷，呢個係可以搵到錢咯，最理想係成隊Band，開小型演唱會咁搵錢。」達哥形容現時音樂人出唱片都蝕錢，盈利要靠商業活動，雖然「市價比以前低，只係得達明一派當紅時出騷價嘅一半。」
不過仍要堅持大量出碟，原來他有一套低成本創作模式。「最好係食餐飯就算」，達哥拆開手中去年出版的專輯《希望之旅》，指其中一首糖兄妹主唱的歌曲，源於與其老闆相熟，結果對方只要求「食餐飯咯」作酬勞。他道出這盤除笨有精的生意，「好多都唔使錢，而嚟緊呢隻碟亦係用最少價錢做，最貴嗰樣係錄音，作曲作詞編曲我全部做晒，𠵱家已經唔使大嘅錄音室，電腦加一個做音樂嘅軟件，買支結他同埋琴，好平就可以做隻碟，係賣到三、四千張，我都有錢袋，但一定只得小數目。」這出碟計劃與達明一派無關，與黃耀明第三次重組是為搵錢，「出碟會蝕尤其係佢做，起碼最少蝕二、三十萬」，其言指明哥喜愛豪華製作。
計劃年底開畫展
為配合今年能多做幾場演出，他初步計劃年底開辦人生第一個畫展作同步宣傳。但他說仍有很大變數，先籌備好今年，未有長遠計劃。達哥最牽掛的還是當初未做成的音樂公司，「希望搵志同道合嘅人夾錢搞小型Label，簽新人返嚟，香港有好多唱歌好聽，但冇出路嘅band……風險好大，亦未有資金，可能有人投資幾千萬要個仔唱歌出名，實有呢啲」。
一生經歷多重挫折，最低谷試過想自尋短見，但達哥都一次次爬起來，繼續堅持自己的音樂理想，這是真正的大智若愚。
劉以達檔案
姓名：劉以達（達哥）
年齡：50歲
學歷：中五畢業
妻子：冼美珍
事業之路
1980：組成首支樂隊DLLM
1983：參加《結他雜誌》的結他比賽獲獎，當年冠軍為Beyond
1985：登廣告徵得黃耀明任主音，組成樂隊「達明一派」，在香港非主流音樂界打響名堂
1990：因音樂理念不同，達明一派拆夥
1991：先後組成新樂隊「劉以達與夢」等
1994：憑電影《誘僧》獲第30屆台灣金馬獎、第13屆香港電影金像獎的最佳電影配樂
1996：推出個人專輯《麻木》
1996：獲周星馳賞識，分別演出《大內密探零零發》和《食神》中演配角「情報人員」和「夢遺大師」，闖出喜劇路
2006：回歸音樂市場，與廣州女孩李璐璐組成樂隊「達與璐」，並自資出唱片
2008：由過去篤信佛教改信基督教，並領受洗禮
2009：組成樂隊LOVE MISSION，推出收錄福音歌的專輯
2012：達明一派「復合」開巡迴演唱會；推出個人唱碟《希望之旅》
2013：將舉行「三喜宴」，在小型音樂會上慶祝50大壽、夫婦結婚15周年及推出新碟