我有位朋友對電影的要求很特別，不求明星，無需大場面，專好恐怖片。再細分類，喪屍片最合口味，結果日睇夜睇，終於悟出一個道理：好的喪屍片不用場場打爆頭、或者特技如何天衣無縫，最緊要的元素是，對主角有身同感受那份喘不過氣的絕望感。
每次我夜半起身睇波，總會想起這位朋友，因為每次均「口擘擘」打呵欠，周身「屍氣」，在漆黑中拖着疲乏的身軀，有如喪屍般從房間走出大廳這三幾步路，尋覓精神上的「食糧」。在不騷擾家人下左右摸黑找尋遙控器，然後撳着電視，靈魂像上了電，眼球對好焦點，才回復丁點人氣，不過面容仍是「口擘擘」，坐在梳化，慢慢由喪屍進化成活死人。但能否恢復人性、重拾激情就要視乎賽情精采與否。若然不幸比賽沉悶，通常就會停留在活死人階段，不知所措到天明。
有時為避免這種茫然情況，唯有等待歐聯淘汰賽這類大戰才會放手一搏，任由自己變成午夜喪屍。
果然皇家馬德里對曼聯的16強首回合大戰，短短幾分鐘就叫我立即醒神。雖然皇馬在歐聯淘汰賽歷史中，12次首回合未能先拔頭籌而待至次回合才贏波晉級的情況只出現過一次，數據上真的「夠晒絕望」！幸好比賽分兩回合，就似喪屍片的主角，無論有多絕望，都總有機會博翻身。一波未平，一波又起，下星期二、三兩晚，大家一於化身喪屍睇歐聯。巴塞、AC、拜仁、阿仙奴統統等緊你。
龍華琛
有線體育主持
mailto:[email protected]