【投資有道】
劉以達糊塗還是精明，講到錢便見真章。達哥在「達明一派」時期賺到第一桶金，20多歲已榮登業主，他更聲稱過往數次物業買賣都有斬獲。但達哥前年高位放售一個銅鑼灣單位賺到近兩倍後，現時只租住大埔村屋，未見有樓揸手。
「買樓啊？買，買！最好嘅投資方法嚟㗎啦，買金都唔得㗎……但𠵱家啲樓癲咗，點買啊？可能兩年後先考慮。」達哥慨嘆去年做了數場達明一派演唱會，都未儲夠錢再入市，「即簡簡單單一層村屋，都成500幾萬，我唔想供啊，銀行收息係合法大耳窿，好多年前供過，係咁供息，一定要一筆過買。」
達哥說，「達明一派無可否認係我商業價值最高嗰時，當年已經供樓，兩年後賣走，美孚第二間供滿，再去銅鑼灣……每次買賣樓都有賺啲嘅。」
沽禮頓道物業勁賺
資料顯示，達哥93年承造按揭，以215萬元買下禮頓道崇蘭大廈的900呎單位，直至2011年在598萬元的高價賣出，18年間大升1.78倍；然而當中涉及在99年有五分之二業權以90萬元轉讓。「供滿後，前年高位嗰陣咪賣咗，賺咗筆錢，放喺銀行咯。」
這理性的一面是外界所忽略，他笑說，「梗係啦，大眾以為我儍㗎嘛！」他形容家中並無嚴謹的儲錢方式，但當有一筆收入時，都會存入夫婦二人的聯名戶口，雖然基本財政開支均由太太掌管，但每次提錢都要先經過他簽名，算是互相監督。
買樓顯示神通，但他一聽到股票、基金，便稱完全一竅不通，連最多人投資的滙豐控股（005）和長江實業（001）上市編號都毫無概念。雖然存款沒有作投資，但他卻自信「識用嗰筆錢，就可以有進步咯。我唔需要發達，一層樓舒舒服服，有些餘錢自資出唱片已經夠，我唔係要買到棟樓。」