【銅鑼灣→跑馬地→沙田】近年長期留喺內地賺人仔嘅李彩華（Rain），過年返咗香港陪屋企人，噚日初七人日，撞啱又係Rain細佬Ray牛一，於是佢前晚全家去咗沙田凱悅酒店開餐，順便幫壽星仔賀壽。
要的士帶領
Rain嘅舊愛王傲山早前結婚，另一舊愛林峯又同新歡吳千語日本預支蜜月，Rain噚日都喺微博放咗大堆花相示威，佢前晚7點幾，揸住Mini Cooper去銅鑼灣接父母同細佬，再入跑馬地接埋另一女子，跟住開車直入沙田。不過Rain呢個路盲，去到沙田竟然迷路，烏龍行大運，佢被迫停喺附近單車徑問路，但單車友都教唔到佢，Rain就叫阿爸喺的士站落車求助的士大佬，但似乎Rain都係唔明，最後由Rain父上的士，Rain跟車先去到目的地，佢哋一家上咗去中菜廳食飯，可能兜路兜得太耐，成家坐低就狂擦。
另外，Rain噚日喺奧海城出席攝影活動，對於吳千語話同林峯遊日分房瞓，同林峯拍過拖嘅Rain話：「我唔係好信，同房唔一定要發生乜嘢，佢哋拍拖，分房瞓好奇怪。」
採訪、攝影：陳辰、徐錦池、魯萍
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/