八十年代拍過不少經典殭屍電影的樓南光，風光了好一陣子，可惜年少無知，做盡了最乞人憎的事，漸漸風光不再，落泊得為效力的電台絕食抗爭，坊間都不聞不問，游走天堂與地獄，樓南光冷暖在心頭，他不怪任何人，只怪自己太仆街。
撰文：羅美倫
近年轉做電台的樓南光，年前效力鄭經翰的數碼廣播電台，因電台人事變動，輾轉到了網台D100主持《南光雞湯》，講飲講食，給人好男人形象。及後發生數碼廣播停播事件，58歲的樓南光更熱血中年上身，以絕食聲援，但效果連他也始料不及，樓南光說：「估唔到零報道，只有《蘋果》新聞中提過，之後冇人再跟進，真係學到嘢，以前做演藝界點會關心政治，嗰次令我認識到大陸要新聞封鎖，好偉大嘅言論自由好空泛，鄭經翰日日鬧人，變得冇生存空間，以前知有呢啲，但唔理，只知畀幾錢我拍幾多日戲，政治就係生活，可以唔理亦唔需要理。」樓南光入了電台被捲入漩渦，也被迫接觸政治：「絕食係激烈行為，唔係玩，但出嚟冇力，瞓喺度七日冇人理，冇人想知，因為電台本身係小眾，我唔係想攞乜嘢本錢，只係想人注意呢件事，一個藝人減肥都有人報道啩，唔報道係因政治而被淡化。」
經歷絕食事件，樓南光更體會到做演員好，他說：「梗係！錢方面一定好，演員唔使顧咁多，電影演員更加唔使招呼咁多人，自己就衰格唔理人、唔顧人，做電視台都有藝員組、監製要應酬，做完電影之後入無綫拍劇，至知原來外景衫要自己攞。」現在做電台，搵料、寫稿，招呼嘉賓一腳踢，樓南光得一切從頭學起。
事業婚姻盡毀
香港娛樂圈由大圈變細圈，樓南光也由大銀幕跳到細銀幕，再跳到網台，卻是一步步向下走，雖說是環境使然，但他清楚明白，性格影響命運，美滿的家庭，不錯的事業，都被自己的臭脾氣摧毀。曾任婚姻調解員，樓南光能醫不自醫，與太太離婚收場，事業也不濟，在谷底徘徊了好一陣子，他說：「之前谷底過，𠵱家拾級而上，執番個生活，迷惘過一輪，五、六年前搞搞震同老婆離婚，嗰段時間好奇怪，所有嘢走埋一齊，冇嘢做、離婚，個人冧晒，坐喺度呆望電視冇郁過，唔係對方嘅錯，係我對身邊人唔好，我真係一個仆街，佢忍咗咁多年算係咁，唔可以怪人，𠵱家我可以講我係一個仆街，包括同我一齊拍戲嘅人，導演、演員，好多人都頂唔順我，以前係唔係都鬧，搞禍咗好多嘢，演員做唔到、幕後又唔得，嘭一聲冇晒所有嘢，唔係能力，係個人嘅態度問題，態度影響一生，對之前做嘅嘢好後悔。」
玩人註定失敗
性格操控態度，樓南光在電影事業順境時，見曾志偉及譚詠麟怎樣就有樣學樣，卻不明箇中分別：「以前記者唔想訪問我，傾到第三句就想走，因為我玩人，我又唔係曾志偉、陳百祥、譚詠麟，出到嚟咪討厭囉，我有好多機會成功，但注定失敗，阿倫咁成功，主要態度好，佢對助導都係朋友，因為我冇用好態度去迎接成功嘅機會，跟住自己冇市場價值，就失敗晒。」
幸好樓南光最終知道自己的毛病，對症下藥，視電台工作為一個療程，令自己由谷底慢慢向上爬，拋開所有包袱，從頭來過，除做電台外，他亦準備出書，又搞相睇工作室，樓南光說：「𠵱家至執番啲信心做人、做嘢，之前好似成盤螺絲跌晒落地，𠵱家執番好多，不過仲未執好晒。」
【愛放笑彈】
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/