林峯公開認咗吳千語係女友後，即飛日本慶祝情人節，噚日千語終於結束蜜月假期，喺銅鑼灣出席I.T活動。講起男友顯得有啲緊張，問佢係咪同林峯同房？千語口震震話：「同行仲有朋友，呢啲係私人事唔想講，不過係分開房瞓。」19歲就同男仔去旅行，佢話媽咪都知，今次玩得好開心。提到林峯俾人影到證件相，佢話：「始終係私隱，唔係幾好。」佢仲澄清新年冇去廈門探林峯父母，但就有打電話拜年。
讚負責任男人
前晚情人節，問千語收咗禮物未？佢話：「未收，亦未送，送唔送要問佢。」佢話原本冇諗住公開戀情，但大讚男友有責任心同有義氣。問到有何追求攻勢？千語話：「其實好自然，識咗一段長時間先一齊，佢係個好細心，對朋友好有責任嘅人。」佢仲話同林峯年紀有差距，但大家話題喜好都一致。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/