大年初三暴冷暴熱嘅沙田日馬，仍吸引逾15億元投注額加11萬人破紀錄進場，可見中國人新正頭鍾意賭多些少湊吓熱鬧。本周末英國波由上輪爆到七彩嘅英足盃作主打，強隊普遍賠率仍然雞肋，就算見到極受歡迎嘅英國波，冇分頭也要忍下手。反而英超明日有場獨腳戲，利記主場迎領隊嘅舊球會史雲斯，決再以[+1]「天鵝」作周末重心。
現今銀紙唔值錢，物價飛騰，送吓襟針抽吓獎有人指點吓迷津，莊家小恩小惠已能輕易谷爆賽馬投注額；難怪好多人唔明剛過去周三歐聯世紀之戰皇曼對決，等了又等，馬會依然唔照全世界外圍莊家開出皇馬讓1球嘅讓球盤，吸引波友用最少200蚊下注，谷大投注額？原因，根本係唔使谷！因為個彩池已經好大，而且「讓球主客和」三瓣更難估，抽水更重。
明日曼城同車仔，兩支近期喺聯賽輪流失分嘅藍色班霸，主場分鬥列斯聯同再鬥甲組賓福特（第4圈重賽），莊家開出[-2]畀多幾蚊大家，要贏到3球先收錢，個人會反手博列斯聯「客勝」。一來曼城比賽信心陷低谷，連神龍赫特都失水準，文帥地位岌岌可危；相反由新財團入主嘅列斯聯由領隊禾諾克到前鋒迪奧夫都不乏惡漢，現排英冠11位，爭升上英超機會唔太樂觀，不如叠埋心水博唔輸返到主場重賽收多場，呢個[+2]2.55倍，就算輸1粒都收錢。
重心，再捧上仗大炒昆士柏中得應棍嘅「天鵝」史雲斯，距離下仗英聯盃決賽大日子只隔一周左右，此刻各戰將戰意更虹；欣逢面對舊主帥羅渣士領軍、但此刻排名仲比「天鵝」低嘅利記，紅軍主W開1.41倍，離譜過皇馬開1.43倍W鬥曼聯！紅軍今季聯賽主場未贏過排名比佢哋高嘅對手，史雲斯小瑕疵只係中堅大將捷高倦勤；但中前場流暢度遠勝紅軍，射手米捷也難防（天鵝剛在杜拜曬太陽集訓，利記精銳盡出敗走嚴寒俄國），2.57倍[+1]，必取。
湊熱鬧，取今晚阿仙奴，向來鍾意主場大炒布力般，亦唔會理下周中硬拼拜仁，不過冇分頭，只宜波膽博冷出擊！
蘋果波神
（下次見報日期：23/02）