現年37歲的佘詩曼參選97年港姐而入娛圈，至今入行16年，曾奪06年台慶頒獎禮視后，原本穩坐無綫首席當家花旦的寶座，誰知前年毅然改簽部頭合約。呼吸過自由自在的空氣後，阿佘坦言有新的生活哲學，她說：「𠵱家係新開始，學識去生活，女人真係唔可以唔保養，唔可以濫用你嘅青春，我𠵱家開始領悟咗呢個道理，我就做吓停吓，好好分配啲時間。」
撰文：何慧斯
風塵僕僕的佘詩曼，中港兩邊工作密密麻麻，碰巧早前無綫收費電視正重播阿佘早年舊作，感覺上與眼前的阿佘分別不大，只是比當年多了一份自信，她接受本報訪問時笑說：「都唔係㗎，可能自己睇自己咪覺得有囉，或者係經歷令人改變，其實一個演員嘅經歷都幾豐富，好似我差唔多拍咗成50套劇集，我演過50個唔同類型嘅人，即係話我活咗50次，加埋自己咪多一次，變咗人生經歷都幾豐富。」
母親生病領悟大
問阿佘怎去形容現階段的生活？她笑說：「好舒服，𠵱家可以拍鍾意嘅劇本，去啲自己鍾意嘅活動，唔係話以前冇自由度，而係以前個心態係衝呀衝呀衝，𠵱家係識得停、識得唞，女人真係唔可以唔保養，唔可以濫用你嘅青春，我𠵱家開始領悟咗呢個道理，我就做吓停吓，好好分配啲時間。」
阿佘有這個轉變，除了是重複又重複的工作令她覺得有點疲累外，最重要是佘媽媽早年試過有一場死過翻生的大病，阿佘說：「嗰時開始諗呢個世界唔係只得工作，仲可以有好多其他嘢，上天畀機會你再享受家庭樂，如果你都唔去珍惜，下次可能冇喎，一個sharp cut就玩完喎！所以𠵱家係新開始，學識去生活。」
對感情一切隨緣
否以前在無綫工作不能揀工作？阿佘說：「以前都有得揀，只不過係你唔想得罪人，我喺嗰度大，同個個監製都好friend，結果搞嚟搞去都唔完，有一年最多試過拍百幾集，真係好恐怖。」
阿佘的感情生活向來是焦點，對於緋聞，她一向豁達處理，她說：「我只不過係一個演員，都會有我嘅生活，我唔可以為咗人哋而改變我自己嘅生活。」對於尋覓另一半，阿佘謂一切睇緣份，她說：「隨緣啦，好似我姪仔嚟呢個世界一樣，初初我阿哥阿嫂都唔想要小朋友，避咗10年都冇要，點知有一日打嚟話阿嫂有咗，我見到呢啲嘢咪覺得個天要你有，就一定會有，好多嘢要睇緣份，我相信自己一定會有，不過我係揀緊啲好啲，要睇定啲同互相了解，一生一世嘛。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/