每年的農曆新年前後，葉玉卿這個胡家總司令，在位於紐約的大宅內忙個不停，家居佈置、煎糕整餅、為子女選購新衫紅底。到了大年初一凌晨，卿卿會在家中佛堂為家人祈福。跟着胡家一行十幾人直奔布魯克林（Brooklyn）的大覺寺參拜，風雨不改。每一年、每一天總司令葉玉卿發揮了最大的作用；去年年尾這個胡家總司令「走佬」返香港拍戲，立即令胡家人仰馬翻，女兒哭着找她，老公亦因缺乏安全感而半夜打電話給她……
撰文：楊潔雯
除了一則不愉快的破產新聞，葉玉卿接受曾志偉邀請接拍了賀歲片《2013我愛HK恭囍發財》是好多於壞，事關當事人戲癮大發，剛巧回港探望病重母親，一切都是機緣巧合。
即使引來不利傳聞，卿卿亦無悔答應回港拍戲，她日前接受專訪時說：「講真我唔怪佢哋，我自己都鍾意睇，真係娛樂性豐富，我唔可以講佢哋（雜誌）係生安白造，佢哋只係抽好睇嘅橋段放落去，生意係有賺有蝕，但我唔係慘到要拍戲撲水，唔係事實全部，自己都衝動咗去開記者會，我當時好激動，對我先生嚟講係認真做生意，寫咗人哋會以為真係有事，一筆生意本來傾成就禍咗！」
「錢對我嚟講多餘」
卿卿無悔接戲，卻承認衝動開記招，她笑說：「唉！其實清者自清，講咁多做乜嘢，自己解決自己問題，時間可以證明一切，有錢冇錢同拍戲冇關係，𠵱家錢對我嚟講係多餘，搞到幾核突！」無論如何，卿卿愛夫情切，可以理解！
卿卿接拍賀歲片，胡家上下冇人反對，卻亦肯定冇人贊成，第一個不反對應該是老公胡兆明，卿卿說：「因為佢知道我今次返嚟主要係睇我媽，呢套係賀歲片，我諗住過鏡做路人甲乙丙，做阿倫老婆有乜嘢做，冇壓力，又唔係要我拍一個好大嘅戲。如果話得我自己做女主角，佢梗係唔會制，所以今次佢冇反對，以前佢會話唔好拍，人哋會以為佢要我出嚟做嘢，佢係有少少嗰種好儍嘅大男人主義，不過呢個係我鍾意做嘅嘢，老實講過咗咁耐正常生活，我覺得人應該要平衡囉！」
卿卿做了17年胡太，表面上過着無憂無慮的少奶奶生活，實際上，卿卿跟所有女人一樣，同樣要面對婚姻和感情路上的一大衝擊，就是理所當然，卿卿說：「相處耐咗大家唔會去珍惜，成日覺得應份。結婚咁多年，經歷過唔少，磨擦梗會有，不過，每次經歷過之後會更好，我同老公關係亦唔會因為任何嘢咁易改變，因為我哋係親人。」
贏老公更多尊重
事實上，今次回港探望病重母親同時兼顧拍賀歲片的卿卿，拍攝中途媽媽去世，她堅持繼續開工，結果贏得老公更多尊重，她說：「畀佢知道，原來我媽媽死咗，我都要去拍戲，仲話佩服我，話我咁樣都可以再返去繼續，仲唔話畀人聽，我話一切唔可以改變，媽咪唔會翻生，唔通要個個好可憐咁望住我，我拍緊喜劇，嗰場戲係要去搞笑，我唔可以帶住嗰個情緒去演，最後我贏到佢嘅佩服同尊重。」
或許多年來老婆隨傳隨到，所以今次卿卿忽然接戲，老公胡兆明少了一份安全感，對卿卿就多了一份緊張，卿卿說：「好好笑！有一晚佢半夜打嚟，可能係飲咗少少酒，好似high high哋，喊咁聲問我做乜咁辛苦，半夜4點幾仲喺度拍嘢，我話：『I enjoy it！』所以畀佢知都係好事。」
讚媽媽勇敢堅毅
去年12月9日卿卿媽媽去世，享年89歲，當時正投入拍攝賀歲片的卿卿，對劇組隻字不提，卿卿自言勇敢堅毅個性，遺傳自母親：「我係排第11，兄弟姊妹喺世界各地，今次因為媽媽我哋竟然可以團圓，媽媽在生時冇同任何一個仔女住，因為佢唔要磨擦，佢好偉大，我覺得陪佢嘅時間唔夠！今次返嚟兩個禮拜，係近10年我同媽媽一齊最長時間，我記得每次坐月，佢會嚟我度一個月，BB滿月佢就走，最後一次佢已經係70幾歲，每次搭飛機腳會腫晒，我都有遺憾，喺佢未病之前，我叫佢過嚟美國，坐我哋架私人飛機，住番幾個月，悶就送你返去，點知……」子欲養而親不在，說起已故的母親，卿卿熱淚盈眶，再說不下去。
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/