台灣名導李安憑電影《少年Pi的奇幻漂流》第三度獲提名奧斯卡最佳導演，套戲總共獲得11項提名，能唔能夠再為華人爭光，等到今個月25號舉行嘅頒獎禮就有分曉。不過01年李安憑《臥虎藏龍》問鼎十個獎項，包括最佳電影、最佳導演同最佳外語片，風頭一時無兩。
《臥虎藏龍》演員陣容鼎盛，有內地嘅章子怡、台灣嘅張震，同香港嘅周潤發，堪稱全球傑出華人系列嘅結晶，賽前一直被美國傳媒同著名影評人捧為大熱，博彩公司仲開暗盤，李安攞最佳導演係2賠1！點知頒獎禮嗰晚，大會宣佈由《毒網》導演史提芬蘇德堡（Steven Soderbergh）奪得最佳導演，好多人都呆咗，李安亦流露出失望神色。《臥虎藏龍》最後奪得最佳外語片、最佳攝影、最佳美術指導同最佳電影音樂四個獎，總算有個安慰。
不過皇天不負有心人，李安06年憑《斷背山》（Brokeback Mountain）再戰奧斯卡，結果贏番個最佳導演獎。希望今年可以再下一城啦！
撰文：阿Wow
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/